【大棋局】特朗普反口真正目的(Mr.Tregunter)
石油Tregunter
特朗普方唐鏡上身,一時話貿易戰有得傾,轉頭反口關稅照抽;一時話放中興生路,轉頭傳加大罰款,彈出彈入如入無人之境。貿易戰把握一件事我哋就能明白:美國原油產量急升至每日1060萬桶,已經超越沙特及俄羅斯成世界第一,沙、俄兩國每日產油量在1000萬桶上下。美國成為全球第一產油國,啲貨邊個接?只有中國及印度啃得落,尤以中國畀得起靚價。
因此貿易戰無論如何演變,其中一個核心都關乎能源。用西方哲學講法,美國變成能源出口大國為情勢本質,特朗普嘅打法只係手段,用中國哲學講法係體用,用佛學講法係性相。而當中一個關鍵,係美國準備將石油美元迴路扭轉逆行之際,中國企圖趁空隙搶佔東亞石油定價權。
炒期貨要先明白benchmark price,石油由於度度出產質量唔同,所以主要睇密度同含硫量兩個標準,低密度,含硫量低就係靚嘢。現時世界有三種油作為石油嘅benchmark price,分別係美國WTI,北海Brent及中東阿曼原油。全球石油主要以三隻油價為benchmark price,然後按自身質量去定價。WTI在芝加哥商品交易所玩,Brent在洲際交易所玩,阿曼原油在杜拜商品交易所玩。但杜交所其一股東係紐約商品交易所,其原油合約由紐交所一手設計,結算亦係美元,所以世界三大石油benchmark price都係美國玩晒。
當石油美元迴路逆行時,原本作為石油美元代理人嘅中東國家就頭痕。中國看準時機,想趁此機會叫中東國家賣油畀中國以人民幣結算,上海國際能源交易中心今年推嘅石油期貨,其規格即主力迎合阿曼原油及俄羅斯烏拉爾原油質量,目的在搶佔亞洲交易時段東亞石油貿易嘅定價權(東亞主要入口阿曼原油)。
豐臣秀吉死後,德川家康發動了三場戰爭。第一場關原之戰,藉由挑動豐臣家文武派鬥爭,令忠於豐臣家嘅諸侯、大臣折損大半;第二場大坂冬之戰,打到一半德川講和,條件係豐臣家要將其根據地大坂城護城河填平,並拆毀副城;第三場大坂夏之戰,直接攻陷大坂城,豐臣家滅亡。
特朗普看似翻來覆去,其實只有兩個目的。其一,藉由反覆揼中國心口,要中國買美國頁岩油及天然氣。其二,當中國被迫大手買美國能源時,其人民幣定價嘅石油期貨便廢咗一半,不再具威脅性。
全球樓行 Dream House零距離
https://hk.feature.appledaily.com/overseaspropert