前美國國務卿賴斯到中大演講，有學生示威，演講前在講室外派發抗議信，演講後在演講室內有一名學生高呼口號反美，衝上講壇，立即俾保安人員帶走，賴斯在美國見慣不少相同場面，在國外演講當然亦曾遇上不少反伊拉克戰爭人士，故此驚都未驚過，仲立即從工作人員手上「搶咪」，講埋最後一句：「示威是民主社會享有的特權（Privilege）。」
身為大學生而又參加學生會嘅，思想大都傾左、反美、反殖、反帝國主義、爭取民主，歷來如此。香港嘅大學學生會自一九七二年以後全面走傾左路線親北京四人幫，因76年四人幫事件調整親中方式，再因89年天安門事件而反北京，到咗現在，有啲大學嘅學生會嘅政治面貌已變得幾模糊，立場不清，但中文大學學生會就二十年不變，故此賴斯到訪，佢哋唔抗議先至係新聞。
在校時期讀書之餘，有精神去搞示威，抗議乜，抗議物，家長唔使驚，學生有獨立思想啫，要驚嘅就係自己仔女掛住抗議，唔記得讀書，GPA（平均積點）低過二，以至低過一，咁就唔掂咯。一流學生領袖多數聰明過人，夠膽開完通宵會議而即刻參加考試，成績在三點以上，唔到其他學生唔服。假如掛住搞學運弄致成績滿江紅，最好有自知之明，以學業前途為重，退出學生會，專心讀書好過。有人問過滙豐中國董事長鄭海泉：「你讀書時帶過盲人上街、瞓街，咁你考學位試成績如何呀？」鄭海泉話：「考到二級榮譽甲等囉！」嗱，呢啲就係樣辦嘞，搞中大學運搞得激（七二年之時示威瞓街所受之壓力遠遠大於今天反高鐵），讀書讀得好，出來社會做事就步步高陞，成為銀行大班，繼而做埋中文大學校董會主席，是為學生領袖榜樣。
一啲人在校時搞學運搞慣咗，畢業後做事冇心機，成日以昔日少少威風為榮，鍾意返學校向學生會指指點點，行為難以令人明白，根本有負父母培育之恩。