韓國年度盛事《MAMA音樂頒獎禮》今年舉行為期一周嘅盛典，噚晚喺香港亞博館圓滿結束。

當中現年46歲嘅韓國「大長今」李英愛噚晚就擔任《MAMA》壓軸頒獎嘉賓，頒發「年度最佳專輯」予男團EXO，愛姐噚晚先後換咗兩套晚裝，行紅地毯時就以全黑色晚裝裙示人，到晚上頒獎禮則換上雪紡裙，艷壓全場。

而愛姐噚晚做完頒獎嘉賓後，亦有到After party，鄭紹康亦有同愛姐合照。愛姐稍作休息後，今日終於出動，讀者李小姐透過《蘋果》爆相爆片，目擊愛姐今日下午1時30分現身中環戲院里附近，佢創立嘅天然護膚品牌嘅專門店巡舖。愛姐喺店內與職員有傾有講，表現十分友善，未知是否教導職員有關產品嘅資訊。由於「大長今」大駕光臨，而店舖又喺地面，所以令店外有成近百市民圍觀，場面好墟冚。

愛姐見到有咁多市民喺門外都有點驚訝，不過佢就相當親民，喺店內都有同出面粉絲同市民打招呼。愛姐喺店內逗留半個鐘後，就喺5、6名保安護駕下離開，而佢喺店外見到粉絲熱情邀影合照都來者不拒，親民地同佢哋頭貼頭影合照，仲親自拿住手機拍照，友善爆燈。

更多韓流，喺晒《娛果》
http://fb.com/appledailyent