盧卡着住件10號波衫,推住個波,盤扭技術唔錯,幾有老竇當年爆到美斯食塵嘅風采,佢仲扭過大衛雷斯叔叔,搞到呢名全球第一身價後衞出醜。當然,雖然大衛雷斯間中都會失準,有時仲被人笑佢係「雪糕筒」,但相信呢次佢係特登放水,由得盧卡扭過佢,當𠱁吓小朋友。盧卡仲表演射門,射破由老竇把關嘅龍門;話唔定十幾年之後,卡卡同尼馬嘅囝囝會成為巴西前線嘅盧卡雙煞,因為尼馬囝囝咁啱又係叫盧卡。講開尼馬,佢呢排喺巴塞隆拿踢到曉飛,甚至令人覺得佢夠晒班頂美斯個位,巴西兼巴塞名宿李華度就話尼馬係𠵱家世界最好嘅球員,可以贏得今屆金球獎。