李家鼎的私房菜今日在銅鑼灣開幕，作為總廚嘅佢，同兩個仔及新抱一齊現身，鼎爺口中稱嘅「李師奶」——紅顏知己亦有出現，前日試菜已設兩圍，生意訂單不絕，booking排到新年，鼎爺笑言預計兩個月沒假放，兼向電視台再請假。

鼎爺凡事親力親為，他指人家欣賞自己，唔可以瞞天過海走咗就算，仲話兩個仔如果想幫襯，都一樣要排隊：「一視同仁！包括李師奶都一樣。」

訂單多，銀包脹滿啦！鼎爺笑言：「未夠脹，我荷包如籃咁大，大過荷葉。」而他見到李師奶到場特別開懷，至於二人可有註冊成婚？鼎爺稱：「我冇叫佢太太，嗌師奶咋，如果註冊後又搞第二個，咁註嚟做乜？拆樓就有份，我個人好公道，唔會搵人笨。」

開張儀式舉行之前，鼎爺仲「追上潮流」開咗個fb live，活用social media賣廣告。鏡頭前的鼎爺似乎有啲緊張，佢自己都話心情好緊張:「一班拍檔同裝修工人漏夜趕工先至趕起，好多謝大家咁幫忙。」佢話呢檔生意用咗七八個月籌備，笑言老闆比佢要求仲高，裝修都係咁改，所以比預期遲咗。

噚晚鼎爺同眾師傅已經準備定今日宴客菜色，前菜有椰皇酸薑皮蛋、懷舊蜜汁叉燒、蚵仔卷同秘製醉鮑魚。至於主菜包括：阿爺黃金蠔、椰皇燉嫩雞、荷葉龍盤鱔、阿爺乞兒雞、紫晶生炒骨，仲有就係黃鱔焗飯同呢個「懷舊明目萬壽果糖水」。

預約期去到下年二月，鼎爺謙稱：「我真係好多謝大家嘅愛戴同支持。」主持人笑言好多Fans因為book唔到位而鼓譟，鼎爺話：「唔好鼓譟，食好嘢，係要俾時間，急呢，就唔會有好嘅收成。其實我都仲譟緊0架，你睇我個樣，依家，隻眼都跌晒落嚟，仲要俾公司夾我返去做多個節目，每個星期九個菜嗰啲啦，慢慢大家就知。」

鼎爺又話依家有幾百個菜喺手，「十日至兩星期就會轉新菜式，拍檔啲廚好幫得手，佢哋都有介紹啲菜式俾我。」