吳若希(Jinny)、衛蘭(Janice)同鍾景輝(King Sir) 今日去到九龍培正中學出席港台記者會，佢哋向學生分享閱讀同聲演心得，其中Jinny就話會分享一本有關陳美齡去非洲探訪嘅書籍，佢話：「自己都有合作嘅慈善機構，但未有類似嘅探訪計劃，如果有機會都好想試下。」

講到要用國語聲演應唔應付到？Jinny話：「還好，自己喺國內出世，細個先嚟香港，雖然唔係北京腔，但都應付到。」仲話細佬喺香港土生土長，但國語講得比廣東話更加好。佢又透露平日喺屋企同囡囡相處時，會混雜多種語言：「我同囡囡用廣東話，工人姐姐用英文，親戚就會用國語，所以有時都幾亂。」

早前表示會積極造人，希望追多個小朋友嘅Jinny話：「試咗一個月暫時都未得，老公唔勤力都冇計。」佢解釋其實同老公時常分隔兩地：「而且有小朋友後大家都放少咗時間俾對方，有時趁囡囡瞓咗先可以同老公一齊拍吓拖落街散步。」

至於衛蘭就表示近年自己都好鍾意閱讀：「依家好少出街又唔去蒲，唔使做嘢時都會喺屋企睇書。」早前聲帶出毛病嘅Janice，休息咗一輪依家已經康復亦重新投入工作，並即將為新專輯錄音。

至於King Sir就透露早前幫TVB拍完新劇，佢話過程一啲都唔辛苦：「佢哋啲時間安排得好好，遲開工又早收，對手黃心穎同張振朗亦好照顧我。」

精選娛聞，喺晒《娛果》
http://fb.com/appledailyent