李八方online︱范國威街頭健身險爆缸收場
蘋果日報 2020/09/20 14:53
范國威街頭健身
綽號「咖喱飯」嘅前立法會議員范國威，雖然已經年過50歲，身型仍然勁Fit，最近更頻頻拍片騷肌。向來有運動習慣嘅范國威喺康文署宣佈重開戶外運動設施後，忍唔住即時操練，仲拍片扮「翻滾吧！阿信」，但佢今日赤裸上身做街頭健身時，就差啲因為後腦撞柱搞到爆缸，事後大叫好痛！
范國威雖已年過50歲，身型仍然勁Fit，最近更頻頻拍片騷肌。范國威fb圖片
八方問過咖喱飯，佢話自己玩街頭健身唔係好耐，近日周圍去試玩，係由於政府早前放寬咗限聚令，加上將軍澳唔少公園都有街頭健身設施，所以想搵合適地方，為街坊開班強身健體。曾經打拳練大隻嘅佢話，覺得街頭健身嘅技術要求高過打拳，因為一唔小心，就好易扭傷手同腰，所以都係覺得搵專業教練去學會好啲。
撞柱一刻。范國威fb片段截圖
唔少網民睇到范國威嘅騷肌相，都讚佢身型勁Fit，「犀利，好臂力，好腰力」，又笑指「操fit的（啲）就啱喇，以後幾個工聯會都埋唔到身」。最多網民則叫佢小心，唔好亂做危險動作免整親。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！