阮兒同莊思明今日喺大埔超級城出席中秋活動，被揭同衞志豪拍拖嘅阮兒明顯狀態大勇，莊思明亦以高衩紅色連身裙現身。

阮兒受訪時就直認同衞志偉拍拖有半年：「我之前病咗，佢好照顧我，依家好返好多啦。」問到係咪因為佢對你照顧有加而撻著？阮兒自爆衞志豪追咗自己好耐：「因為生蛇，仲要喺塊面度，佢就成日嚟照顧我，真係好sweet。」佢仲話衞志豪形象好花弗，所以都要多啲時間觀察吓，跟住就好冧咁話：「依家就靠你哋幫我睇住佢啦。」

問到係咪真係同居？阮兒話要考慮下先，仲話想買樓唔租樓，睇嚟都視男友為結婚對象？佢話：「拍得拖都唔想玩玩吓，拍拖唔係亂拍，定啲嚟，所以我哋開頭都想低調啲。以前我都想早結婚、早生仔，依家更加要專注工作搵錢買樓先。」

至於男友比佢年長12年，阮兒好開心咁透露佢哋都係屬兔，仲話早前已經見咗家長：「睇下中秋後，佢有冇時間一齊返荷蘭探媽咪。我媽咪好open，覺得我揀乜都OK嘅。」

另外，阮兒曾經同莊思明男友楊明傳過緋聞，佢聞言即強調大家係好好嘅朋友：「佢哋一早知，都知我哋好sweet。」

莊思明話早過傳媒少少知：「我未入行已經識衞志豪，佢冇特登講嘅，不過都feel到佢有啲甜蜜嘢。」問到佢覺唔覺得衞志豪花弗？佢力撐好友話：「佢講嘢直腸直肚啫，又唔係花弗嘅人，阮兒咁叻，實冇揀錯人啦。」

問到早前佢批評馮盈盈言論好cheap，反被網友喪插，莊思明解釋自己只係對事唔對人：「由頭到尾，我都冇話佢（馮盈盈），大家都係對件事，佢都係為做節目，我只係被人問咗條問題。可能大家曲解咗我，但我唔想越講越錯啦。」佢話冇向男友訴苦，亦唔會因為被網友鬧就刪社交平台：「個account我㗎嘛，佢哋鍾意寫乜就乜，我都係繼續發表自己意見。」

精選娛聞，喺晒《娛果》
http://fb.com/appledailyent