做人父母要受得住刺激，光是看美國兩本新書的書名，別給嚇窒。一本是GenerationDebt，另一本Strapped:WhyAmerica's20-and30-SomethingsCan'tGetAhead。開宗名義，道盡今日做人父母，養兒一百歲，長憂九十九的辛酸。大批行年二三十當打當紮但在廿四孝家長眼中，依然是養不大的囝囝囡囡，養兒防老的觀念，不必提，根本唔buy過時的這一套。仔大女大，還攤大手板要家長供養，上至零用，下至附屬卡消費，甚至照顧寵物、招呼朋友吃喝旅遊，一律視作家庭必要開支，燈油火蠟，每個崩都拿不出來，要家中兩老付鈔，唔該冇聲，幾十歲大人，黐飲黐食，視為理所當然。

大抵是美國作家大驚小怪，換了英國人，壓根兒將養兒當成養寵物，怎麼能狠心把一條養慣養熟的老狗趕出家園呢。英國人為了兒女近身，不惜用銀彈誘惑，施與受雙方覺得坦然，懶理裙腳不裙腳。意大利家長更厲害，特別鍾意照顧「月光族」仔女，月中已經花光了薪水麼？大安旨意留在家裏享受媽媽住家菜就得了。意大利男人饞嘴得滯，癡纏阿媽，令女友受不了。「歪風」吹過西班牙，拉丁麻甩仔個個食住有靠山，跟女友「嘿休」始終不算家常便飯，唯有上時鐘酒店，房租要女方找數，「外賣」的使費月結下來，賬單還是由女家那位未必是準外母的搞掂。
從Gap過渡到Debt，香港家長的負債情況，應當比日本輕。東瀛NEET族和隱蔽青壯年的數目，遠比公布的五十多萬高。今天做人父母比做人新抱、做人大代表、做人特首更艱難，跳樓父母會愈來愈多。還叫人生三個，等如掟人落街三次。