朱千雪同《出貓特攻隊》第二女主角Oomeisaya(飾演明詩)，今日喺尖沙嘴出席星展銀行發佈會，21歲嘅「明詩」着上紅色連身裙，仲大晒廣東話：「大家好，我係Oom。」勁有仙氣，引得在場男士起哄。

講到上次宣傳電影時嚟唔到香港，「明詩」就話當時有兩部戲拍緊，所以嚟唔到，仲話佢隊友Aokbab買咗零食畀佢，佢一日就食晒！「明詩」噚晚到港，今晚就要趕住返去泰國做嘢，佢話：「第一次嚟香港，好想住多幾日，最想去迪士尼同行街，唔係想買嘢，係想體驗香港人生活方式。噚日去半島食中菜，好好食，想再食多幾次。」其間在場記者介紹林作畀「明詩」識，因為林作直認對佢一見鍾情，「明詩」就好有禮貌咁話：「我唔識佢，不過都想認識佢，希望佢可以一路follow我。」「明詩」仲話自己單身，大讚香港男仔白雪雪、眼細細好可愛。

另外，朱千雪就大讚「明詩」超級靚女而且有禮貌，更笑話畀人覺得似對方好開心，笑言自己係「港版Oom」，佢透露有同「明詩」傾偈，會介紹佢去香港邊度玩好，仲提議佢一定要去試香港街頭美食，例如雞蛋仔、牛雜同魚旦。千雪話自己好耐冇去泰國，如果下次去希望明詩可以陪佢。千雪話：「希望會拍港版《出貓特攻隊》，搵我做，多謝佢帶契我有嘢做。」問到千雪讀書時期有冇出貓？佢就話未試過亦冇膽量，仲自認老套，覺得讀書只係人生一部份。