江嘉敏同胡鴻鈞今日喺新蒲崗出席商場活動，配合世界盃即將來臨，佢哋玩踢波。最近王浩信又傳同陳自瑤婚變（新聞連結： https://bit.ly/2J5Sxe7 ），江嘉敏同王浩信傳過緋聞，就話拍劇好忙冇睇新聞，直至噚日記者問先知，但唔會刻意主動關心對方：「自從拍完劇就冇聯絡，突然關心會好唐突，好似好八卦。」被問到會唔會因為二人嘅緋聞影響對方婚姻？江嘉敏聽足問題幾次都話唔明白，最後佢話：「應該唔關事，除咗拍劇就冇見面。」江嘉敏唔怕緋聞影響形象，會做好自己。

之前許廷鏗被話似BL日劇《大叔的愛》男主角田中圭角色，老友胡鴻鈞被笑話可以一齊拍呢套劇，胡鴻鈞話：「如果公司開劇我會誠邀佢（許）拍，唔介意拍，最重要好笑。」若劇情需要親吻可會介意？佢話：「可能佢介意呢，是但啦，我介意喇！」係咪因為對方唔好錫所以介意：「唔知好唔好錫，我冇錫過。」

精選娛聞，喺晒《娛果》
http://fb.com/appledailyent