華華日日都要去唔同嘅記招，成日都見到唔同公司嘅公關大員，佢哋為咗搞好個記招，可以話係出盡法寶。不過唔講唔知，原來好多名人第二代，尤其出身富豪家族嘅，大學畢業之後都投身公關界！除咗因為佢哋人面廣，識嘅都係大企業高層，搵生意都容易啲，最起碼可以接咗家族生意啲job先啦，吓嘩。
當中年資最深嘅，自然係女賭王何超瓊，之前已經同榮智建堂兄弟榮智鑫個乖女榮文蔚，一齊開咗天機公關（Occasions），喺前年又開多間眾智企業傳訊（Trimaran），除咗搞活動之外，啲客仲包括上巿公司，當中梗係唔少得賭王旗下嘅信德集團啦！
資歷較淺嘅名人女公關，代表有由男仔頭變索女look嘅趙世光寶貝女趙式之（Gigi），佢自己開咗間君臣公關（Crimsons），雖然主要負責慈善活動，但Daddy公司嘅樓盤推廣活動都一手包辦，冇托手踭。

咁新晉嘅名人女公關有邊個呢？華華一時諗唔到，但幾有潛質嘅都有一個，就係美林（亞太）董事總經理及亞洲企業融資部主席黃桂林（唔係三個月學外語嗰個！）嘅寶貝女Lilian，話晒佢Daddy喺金融界都有名氣。Lilian舊年喺美國著名學府波士頓大學畢業，雖然冇自己開公司，跟住入咗國際公關公司BrunswickGroup打工，聽講之前佢每年暑假，都會返香港實習。呢位小妮子年紀輕輕，做嘢就頭頭是道，一啲架子都冇，好多同事都唔知佢就係美林KLWong個女。
點都好，無論係自己開公司定打工，做公關最緊要心思縝密兼捱得，咁後浪會推翻前浪？定係薑係老嘅辣？就要畀啲耐性睇吓嘞。

電郵：mailto:[email protected]