個市雖然繼續跌，但輪到三四線股發威，其中一瓣當炒嘅細價股，係轉型搞石油嘅股仔，包括智富能源（1051）升19%，南海石油（076）升11%，日中最高升到去0.38元，升幅達到26%，以收市價0.335元計，4日合計升近5成，而噚日成交量達到864球，佔公司已發行股數1775球嘅一半，成交量非常之大。
有跟開呢間公司嘅投資者都知道，南海石油勁鍾意發行CB集資，以一間市值5.9億銀嘅公司，就有成超過2億銀嘅CB未行使（未計最近發債）。最近兩次發債，分別係向AvantCapital發行2010年到期、合共4000萬元的零息可換股債券，另於昨日宣布，向CFIFinancial發行1億美元之零息票據，前者以通知前5日平均價105%行使，後者以98%行使。
以過去5個交易日為例，5日平均價係0.2714元，如果行使後股價仲頂得住0.3元，又沽得出的話，就有錢賺。不過去年底亦曾有CB持有人以0.25元，分兩次換咗約1.41億股，較當時收市價分別0.208元及0.163元，呈大幅溢價，惟咁明顯用高溢價換股嘅通告出咗，股價卻無反應，反而跌至0.15元，過去1個月才炒上。
咁離奇嘅換股發債行動，歐陽風真係唔知佢乜嘢葫蘆賣乜嘢藥，唔明嘅嘢最好就唔好去買。

新怡環球（1094）係另一隻出現異動嘅股票，股價單日急升28%。該公司自1月30日停牌，到本周三復牌，當日收市跌咗兩格，到噚日先至有反應。停牌原因，係因未能及時印發年報，違反咗上市規則，因此要等業績公布後才復牌，期內業績虧損由約5800萬元減少至約3600萬元。轉型做資訊科技後，收入繼續縮減，炒上理由除咗賣盤之外諗唔到有其他。
歐陽風