韓片《骨肉同謀》76歲女星金惠子、近日憑新片《不能說的故事…》獲封多個影后殊榮嘅76歲羅文姬以及綜藝節目《尹食堂》70歲女星尹汝貞，三位資深演員出道多年，拍過無數劇集及電影，喺劇迷心目中都有一定嘅地位，而去年三位演員再夥拍多位老牌演員合作tvN劇集《Dear My Friends》，同樣大受歡迎。

雖然香港韓劇迷認識金惠子、羅文姬、尹汝貞三人時已經係好後期嘅事，三位演員多數都飾演「媽媽」、「奶奶」等角色，不過近日韓網突然有三人年輕時期嘅黑白相片流出，引起唔少網民討論。日前有網民喺網上發表「女演員的40年前後」為題嘅貼文，當中就有金惠子、羅文姬、尹汝貞攝於1976年嘅黑白照，以及三人去年出席《Dear My Friends》發佈會嘅相作對比，只見40年過去金惠子、羅文姬、尹汝貞三人變化都唔大，獲唔少網民大讚。

更多韓流，喺晒《娛果》
http://fb.com/appledailyent