周刊報紙以大篇幅揭鄭經翰與名女人的關係，凡係老鬼，都會笑死。怕且只有二十零歲啲𡃁妹𡃁仔記者視之為秘聞。姑勿論鄭經翰是否曾經示愛，呢啲都係多年前嘅舊事，唔通個個男人都只係拍一次拖就結婚？呢單古仔，可當作笑話睇。幾位退休咗嘅老前輩都飲完一杯紅酒之後，公開承認：「唉吔，名女人風華絕代，說話玲瓏，廿幾年前真係靚到出汁，我哋個個都恨不得一親香澤。鄭經翰如果同佢熟，冇起過痰嘅話，唔會係一個正常男人。不過我哋喺商界，嗰陣時重有規有矩，唔會奪人所好，否則就會製造好多娛樂新聞咯。」

名女人之魅力沒法擋，報壇才子、新聞主播、肥仔編導為爭佢而搞到傷和氣，肥仔編導後來索性遠走星洲，至今不聞回來。所以咯喎，由咁有吸引力嘅名女人講鄭經翰示愛被拒，好多人信㗎！不過，信又點？對鄭經翰嘅聲名，絲毫無損。最緊要嘅，係鄭大班結婚之後，對得老婆住，係一個好父親、好老公也。咁嘅陳年老餅嘢都要擺上封面，他日如果發現有問責高官搞婚外情嘅話，點樣處理？
老前輩閱人多矣，定力好夠，佢話四十年來，有兩位尤物令佢一見難忘，充份發揮男人本色嘅，一個就係狄娜，此姝美貌與智慧並重；另一位就係利智，身材凹凸有緻，男士一見就暈得陣，佢都好想向呢兩位美女示好，最後當然知難而退，至於甚麼是「難」？老前輩話：「唔可以講得咁深入嘅！」