當年今日

莫文蔚真命天子馮德倫

蘋果日報 2002/02/24 00:00


莫文蔚在舞台上和電影中的形象,一向予人豪放、性感的感覺,但現實中的她,對愛情卻絕不開放。自出娘胎至今,莫文蔚認真結交過的男友只有三、四個,再見亦是朋友的周星馳已成過去式,至於近日與她傳緋聞傳得鬧哄哄的馮德倫,則是莫文蔚目前的真命天子。
愛情篇–我對感情好執著
莫文蔚(Karen)出道以來,緋聞不算少,當中以她與周星馳維持了三年的一段情最為人熟識,但最終因星爺身邊出現了于文鳳,兩人於前年分手。但窈窕「型女」,君子好逑,近日Karen與馮德倫的緋聞亦炒得相當熱。

珍惜好友周星馳
莫文蔚:莫 記者:記
莫:由細至大,我都只係有過三、四個男朋友,我唔係你哋想像中咁開放嘅,對感情事我好執着同專一。我唔容易投入一段感情,但當我投入時就會一心一意,唔會再對其他追求者有任何反應。
記:星爺用情咁不專,你同佢拍拖嗰陣,你咪好唔開心?
莫(尷尬一笑):呢啲事都過咗咁耐,我唔想再講,𠵱家我可以講,星爺係我好珍惜嘅朋友,佢好有才華,至於佢其他嘅嘢,我已經冇所謂,佢永遠都會係我好朋友。

讚男友積極進取
記:同圈中人拍拖會唔會覺得壓力好大?
莫:我又唔覺得喎!其實我選擇對象只係睇緣分,只要同呢個人喺埋一齊開心就得,我唔會好似一啲人咁,要列出一張擇偶清單去搵對象,我從來唔介意同圈中人拍拖。
記:咁最近你係咪同馮德倫蜜運中?
莫(笑得異常燦爛):感情事我真係唔想講咁多,你哋咁聰明,有啲嘢我唔講,你哋都應該估到,我覺得馮德倫係一個好積極、不斷求進步嘅演員,同我都幾啱傾。

被追求滿心歡喜
記:你對感情專一,如果你嘅對象唔專一,你能唔能夠承受打擊?
莫:傷心就實會有,但不至於要生要死。其實有時我處理一啲事會幾衝動,但我將啲唔開心嘅事發洩晒出嚟之後,再瞓一覺就乜事都冇,唔會將啲唔開心嘅事一直擺喺個心度。拍拖梗係有開心同唔開心時候,但我相信女仔。