【李八方online】楊明醉駕毀山頂80年石牆 政府拒派人交代
蘋果日報 2020/09/02 19:07
李八方online楊明醉駕鄭麗琼中西區區議會
有醉駕前科嘅無綫藝人楊明，上月8日凌晨涉嫌醉酒駕駛，撞毀山頂一段長約3米嘅砌石牆後，有人事後發現幅砌石牆早建於1934年，有成超過80年歷史。多名中西區區議員為修復砌石牆原貌，聽日（3日）就會喺區議會嘅事務委員會要求路政署以「原汁原味」方式重修，同埋依法向楊明追討有關維修及行政費用，並要求相關政府部門到上址作實地視察。但據知聽日5個相關政府部門，包括古物古蹟辦事處、路政署、運輸署、土木工程署、同警務處嘅代表都唔會出席。
中西區區議會主席「琼姐」鄭麗琼今日同八方講，對於政府官員拒絕出席會議解畫感到既失望又憤怒，因為官員開會接受議員質詢，本身就係職務一部份。佢又話，若然政府部門拒絕派人出席，相信民主派議員聽日只能集中火力追問聽日會上嘅民政事務專員，要求佢交代一眾部門甩底嘅嘅原因。
中西區區議會主席鄭麗琼不滿多個政府部門均不派員出席。資料圖片
至於楊明撞牆當晚，派人攙扶楊明上救護車嘅香港警務處，日前以書面回覆中西區區議會時只係話，會由政府相關部門回覆區議會問題，並講明「警方無意派員出席討論文件所提及的實地勘察」。
運輸署書面回覆時就話，考慮到該段山頂道交通情況，將會喺相關位置加設「慢駛」道路標記、「開始減速」同「前面先左轉的連續彎路」交通標誌，進一步警示駕駛人士路面情況。古物古蹟辦事處嘅書面回覆就指該幅石砌牆並非法定古蹟，該辦並無相關資料，但就話樂意向路政署提供技術意見修復呢幅砌石牆。至於路政署都係書面回覆話，已經保留番被撞散嘅砌石牆石塊作為將來修復之用，修復工程喺上個月25號已經開始咗，應該今個月27日完成，維修費方面，就會喺執法部門查完交通意外後，按實際情況同既定機制向涉事人追討。
藝人楊明在8月8日凌晨涉醉酒駕駛，因為拒絕做酒精呼氣測試被捕。資料圖片
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！