一鋪輸清快過打針！瑞士央行上個禮拜四放金融炸彈，突然撤銷瑞郎不可升穿1.2兌1歐元的掛鈎政策，視誠信如無物，引發滙市黑天鵝，瑞郎兌各主要貨幣瞬即飆升逾兩成，令止蝕形同虛設，因炒滙等閒涉二十至五十倍槓桿，持有瑞郎淡倉十居其九即時打靶輸清光，連上訴機會都無。
今次事故帶來兩個教訓，其一是天下烏鴉一樣黑，信譽昭著的瑞士央行竟然好似689叫停投資移民般鍾意kamcholia，長官意志操生殺大權，投資者只能自求多福。其二是事件凸顯炒滙凶險所在，就算你事前set了止蝕做足防範，個市癲起上嚟一下子可血本無歸。

對沖老手血本無歸

瑞士為遏止熱錢過份推高瑞郎，三年半前實施上述掛鈎政策，由於歐洲經濟氣虛體弱，瑞士央行一直須要不斷增持歐元儲備以維護聯滙，但出事前仍信誓旦旦政策不變，令市場深信在聯滙制度下，逢高沽瑞郎可穩賺不賠。瑞士突然出爾反爾，令本來roughly right的策略變成precisely wrong，老散輸鑊金唔在講，唔少滙商因為要幫客戶硬啃輸凸條數而爆煲。聽聞飽經風浪的對沖老手Marko Dimitrijevic亦重創，規模八億美金的旗艦基金因為炒燶瑞郎，一夜間輸清光關門大吉。經上周瑞郎風暴後，市場驚覺央行亦唔信得過，令黃金這類傳統避險資產重獲寵幸人氣急升，上周勁升4.7%，本周有力上試一千三百美元。

奇兵
本欄逢周一刊出