【李八方online】二少鍥而不捨 誓要爭取李小龍紀念館
李小龍田北辰李八方ONLINE紹興市
兩張田北辰嘅相都來自田北辰facebook,不過佢自己都話,喺李小龍像前影嗰相係來自《蘋果日報》。
唔少香港人除咗買六合彩之外,對好多事都係三分鐘熱度。港區人大代表、實政圓桌田北辰呢期跟人大去咗紹興市考察,睇到市內唔少名人嘅故居,頓時勾起佢多年前嘅訴求。
二少去人大考察都不忙喺fb打吓卡。佢介紹自己喺紹興睇過周恩來、王羲之、秋瑾同蔡元培嘅故居,見識到國家好有心咁保育呢啲具歷史價值同特色嘅建築,認為咁樣既可以畀下一代認識歷史、又可以培養更高嘅民族意識。
之但係睇番香港呢,二少就覺得喺文化保育方面就令人擰晒頭、太過保守,好多嘢都驚畀人鬧,次次都要全民共識先肯行一步。二少仲話,佢多年嚟都推動政府將李小龍故居改建做李小龍紀念館,成為香港一大景點,而查實08年(即係十年前),李小龍故居物業持有人余彭年決定損咗物業出嚟畀政府,但要求改變土地用途,只係政府企硬唔肯放寬土地面積比例,令成件事不了了之。
其實二少都無謂咁勞氣喇,政府都唔驚畀人鬧嘅,連特首林鄭月娥都話拎特首嚟出氣冇問題,至於有全民共識嘅嘢,政府都唔一定肯行一步㗎,全民都話尋日應該停工啦,結果有冇停到?