肥媽（MariaCordero）噚晚喺紅館舉行「肥媽友誼長存30周年演唱會」，除咗肥媽屋企人之外，仲有劉偉強、薛家燕，吳麗珠、吳剛及葉劉淑儀等都有去捧場，而肥媽老公就做埋樂手，嘉賓有吳志雄、阮兆祥、鄭欣宜、巫啟賢及草蜢等。

肥媽台上爆吳志雄o依家唔怕出騷，事關喺內地登台1、200場咁簽，搵到好多人仔，志雄哥笑稱自己年紀大，只係搵定退休金啫!肥媽之後又問李天翔入行幾多年，李天翔答入行20年，從未做過主角，好多謝肥媽畀機會佢，企上紅館唱歌。

女子組嘅黑妹認真博到盡，先後換咗兩套衫都拋胸，波濤「胸」湧，連露Bra邊嘅羅敏莊都比下去，肥媽笑稱：「好博呀!推晒上嚟，你個名叫黑妹，今晚準備咗個靚仔叫黑仔畀你，佢就係我哋嘅黑人樂手。」肥媽唱唱吓發覺唔見咗隻鑽石戒指，最後佢個仔幫手執番。