港股反彈後再尋底，上周五最低21661，已明顯跌穿上周二低位21833及50日線（22068），其後反彈上21792收市，但仍大跌646點。今次中期調整，恒指由23558回落，已下跌1897點，跌幅8%，短期調整幅度已夠，唔排除會打橫行整固，視乎外圍因素變化，再定去向。
恒指跌咗近1900點，個別三四線股仔跌幅更大，升得亦跌得，預咗。但大跌後嘅股仔，又到番較為合理，又或幾吸引嘅水平。
今日推介金龍集團（329）。今年2月初，金龍曾上到1.97元，上周最低落到0.74元，跌幅62.4%，跟住反彈上0.83元收市，今日若再升，可確認轉勢，跌得過份，反彈好正常，就算反彈跌幅的0.382，股價已可重上1.20元水平。
金龍的業務好獨特，就係產銷「電子煙」。集團原本做醫療保健產品生意，今年作出重大突破，全面向電子煙業務轉型，預期今年的盈利已可大幅增長。

電子煙全名為「如煙霧化電子煙」（品牌「如煙」），係一種替代療法，可幫助煙民戒煙。由於世界衞生組織（WHO）推動禁煙的時間表逼近，中國於05年起已取消自動售煙機裝置、08年奧運會為「無煙奧運」，以及5年內3成城市無煙草廣告等，中國全面配合禁煙，為金龍業務提供極大發展空間。
睇幾個行業數字，已可知禁煙市場潛力有幾大。現時全球煙草消費額每年高達1萬億美元，而替代療法產品市場每年約20億美元，中國煙民最多，有4億人。金龍收購的「如煙」，目前係以內地為主，但已開展歐洲及美國市場，06年營業額2.86億元，升1.1倍，獲利9097萬元，升1.65倍，盈利率31.8%。
金龍發行CB收購「如煙」，代價12.7億元，換股價1.80元，約8成已兌換；另集團6月配售1.05億股（作價1.38元）同1.51億元CB（換股價1.59元），集資2.84億元，配股同CB大部份由基金接去，其中PentaInvestment現時就持有5.2%。基金上得車，係睇好金龍有廣闊的發展前景，以08年保守估計獲利1.5億元，每股盈利11仙，以目標價1.20元計，PE亦只係11倍，仲係好吸引。