連詩雅（Shiga）、鄭俊弘、菊梓喬噚晚喺維園參加新城音樂騷，Shiga獻唱歌曲《起跑》時態度認真，唱咗幾句之後因聽唔到音樂要重新嚟過。見佢一套秋裝現身，不過就大嗌好凍，佢話：「呢個星期轉天氣，搞到好頭痛，以為自己風濕，上網搵資料話係偏頭痛，有人介紹我睇中醫。」

近日有指佢同音樂監製徐浩翻撻，有愛情滋潤應該溫暖好多，佢話：「唔關事，係我體虛著幾多衫都沾寒沾凍，俾人熊抱住都冇用，要中醫調理身體。」講到運動方面，佢話：「都有想過學網球，但眼同手唔協調，試過食波餅，唔想自己口同鼻更扁，球類運動唔太適合我，有玩開健身同跑步，之前報讀咗健身教練課程，上堂後發現上身體能偏差，要合格都有難度，依家讀緊課程同時要操fit上身，加上好多藝人開show都會騷肌，學識咗就隨時隨地可以靠自己，希望隨時ready狀態。」

鄭俊弘對網球興趣不大，應該同女朋友何雁詩一樣對打高球有興趣，佢話：「我都係初學者，打得到都算叻，唔夠班同女友玩，狀態都係一時時，但曾經試過入球，不過如果落場就會唔見好多波。」佢稍後就會入劇組開劇，但現時仲未收到劇本，慣咗飛紙仔要執生。菊梓喬因為身體單薄對於運動比較弱項，要訓練下整個人肌肉同狀態 。

精選娛聞，喺晒《娛果》
http://fb.com/appledailyent