花旗集團啲次按撇賬好似撇極都唔夠，早幾日市場睇聯儲局下次會減息半厘，都係話因為驚佢唔掂，問題真係咁嚴重？睇吓花旗賣可兌換股份畀阿布扎比啲terms咪知囉。
花旗集團有新水，花旗股市就借勢反彈，不過，相信次按已經搞掂嘅人唔多，或者話仲需要捱一段時間，美國樓價跌幅唔細，但係仲未跌完，消費信心好疲弱，感恩節銷售好，係因為公司「大減價」。聯儲局下個月減息已被市場睇成必然嘅事，但係美元唔生性，減息𠵱家當係當壞消息炒。
港股昨日喺靜市拉鋸，以轉倉為主，今日期指結算，或者有好戲上演。

新地C輪4517：新地（016）昨收152.1元，係支撐大市嘅主力，升返10日線樓上，有機會試上次高位，破位睇172元，可以諗吓隻C輪4517，昨收3.31元，有效槓桿3.4倍，正股升上172元，4517會見4.9元，正股跌穿143元止蝕。