【同人夫詹秉熙一支煙兩份食】仟汶：仲敢上佢屋企玩咩？ 望做善事化是非

蘋果日報 2018/06/25 19:12

劉錫賢詹秉熙麥翠嫻顏仟汶
    顏仟汶、麥翠嫻、劉錫賢、楊峰同仙樂都等藝人，今日喺尖沙嘴出席名為《萬眾愛心歌聲齊抗毒》活動。顏仟汶早前被人影到傳同人夫詹秉熙撓手行街（相關新聞： https://bit.ly/2lvSUV7），佢接受訪問時話：「我回應最後一次，我哋唔係拍拖，係好好朋友。」佢話同詹秉熙、雪梨、歐信希4個人經常出雙入對，係好兄弟姊妹。仟汶話識佢嘅人都知佢玩得好顛，當日落雨所以一把遮兩份用，至於撓手都好普通，佢話：「唔好搞到人哋屋企人，唔係紅顏知己都唔可以做呀?。」佢仲自爆同詹秉熙試過顛到玩騎膊馬，不過詹太太Sandy都在場，仲話拍拖會同大家講。又爆自己上個月同老公已經正式簽紙離婚，自己都想拍拖，但暫時專注工作。講到自己一把年紀，緣份要隨緣。
    當問到如果畀詹秉熙追會唔會接受時，佢話：「到時再講，唔可以假設太多。」講到同詹太關係，佢話冇特別變化，但就唔敢再上詹秉熙屋企玩：「仲敢咩，有聚會大家會嚟我屋企，搬咗新居可以BBQ，歐信希同雪梨成日上嚟玩，扛地鋪。」
    講到早前佢喺Ig講到工作有啲麻煩事，仟汶解釋話喺內地登台，同一場同活動，有唔同公司打嚟報價，中間出現紛爭，搞到佢冇咗一場騷表演。仟汶話搭羅牌透露自己今年好多是非，明年先好轉，佢話：「真係企係度都有罪，做多啲善事化解囉，好似今日嚟禁毒。求是非唔好嚟，唔係多幾個貴人都唔夠頂。」
    精選娛聞，喺晒《娛果》 http://fb.com/appledailyent
    empty
    顏仟汶自言同詹秉熙係好兄弟姊妹關係。（陳慧安攝）
    empty
    顏仟汶性格一向大顛大廢。
    empty
    詹秉熙去年生日，契妹顏仟汶玩到癲騎膊馬，當時Sandy亦在場。（互聯網圖片）
    empty
    劉錫賢身型十年如一日。
    empty
    一班藝人今日喺尖沙嘴出席禁毒活動。