「搶嘢呀！」不過今日開始一連5日絕對老奉，因為沙田西田半年一度嘅購物優惠日即日開始；挾住新形象、新裝修，大批新貨潮物剛壓場，以平絕一折起玩「快放」。歷年慣例以床上用品、羽絨褸、廚具、旅行篋減幅最驚人，攞上手件件起碼一折或半價！唔想執輸，必先睇以下攻略，用螢光筆highlight定目標位置喇！

記者：朱崇德
攝影：陳偉強
Model：Jason、Bon

床品廚具　掃貨之冠

西田優惠日真係陪住好多人成長，西田百貨行政總裁莊偉忠表示：「我哋嘅減價優惠日已經有17年歷史！每年年中及年尾共有2次（5月、11月）……點解會咁震撼？應該由我哋第一次做優惠日開始，不論新舊貨都一樣照減，所以令大家喺17年來都咁支持。」經過14個月翻新裝修，西田全店面積由15萬平方呎增加至173,000呎。今次減價貨品和貨量亦係歷年之冠，比去年增加25%，達10萬多件！去年雖未及呢個貨量，但已吸引到歷年最高每日18萬人流量，就預知今年會有幾迫爆。

行政總裁莊偉忠

歷年購物習慣，最多人喜歡買嘅係床上用品，其次係羽絨褸及廚具用品，所以呢類貨品我哋都會減得最多！

刺探軍情　顧客嚴選心水貨

西田優惠日有個好大特色，就係好多街坊客會喺掃貨前幾日，走落場mark定心水目標，方便減價日時掃得更得心應手。

昅中大電視

我昅中平面大電視同電暖爐，感覺今年減得比往年勁！最正係部42"LCDTV，聽講係新開箱一手靚貨。

床品最抵

心水係CASABLANCA床褥，單人雙人都係$999。另外羽絨被都好抵，都係賣$599咋！

最想買篋

首選係新秀麗旅行篋，三折多到半價極抵玩。另外，BB車都係心水貨，做到八折好難得㗎！

其他筍貨

新店加盟照減

真係早啲嚟都未必見到，女裝部都係剛開幕，好多新品牌好似breadnbutter、OZOC、Catalog、Couple等都係新加盟女裝主力名店，令西田形象煥然一新。除某啲減得勁嘅貨品外，基本正價貨都有七至九折，或加送精美禮品。

行到腳軟　食特價燒餅

另一樣較少人知嘅改動，係3樓超市對出嘅FoodCourt，加咗一批出名嘅食店加盟，如成日排晒隊嘅峰壽司、日本名店MosBurger等。個人心水推介有秀吉燒餅小食，同魚兵衞特平外賣刺身壽司。

小攻略

就算係西田減價掃貨老手都要留意，今年除咗擺貨位有少許改動外，連搶貨嘅入閘位都唔同！以前優惠日會實施人潮管制，限定出入口位置，令年除每日開門一刻限定「入口」外，其他任何時段，所有電梯及出入口都會完全自由進出。

交通

買嘢有車送你返門口

按照多年經驗，西田優惠日其中一個特點，係會特別照顧附近社區老主顧。同往年一樣，會有3架29座小巴，每15分鐘出發往來馬鞍山、大圍同第一城，想搭免費穿梭車返屋企，就留意以下兩大候車地點。

第一城線

西田的士站－瀝源邨－禾輋商場－濱景花園－翠湖花園－第一城郵局－第一城50座－勵城花園

大圍線

帝都酒店巴士站─博康邨─秦石邨─金獅花園─顯徑邨─聚龍居─瑞峰花園─雲叠花園─大圍水車站新強記

馬鞍山線

帝都酒店巴士站─富安花園─觀瀾雅軒─頌安邨─新港中心的士站─利安邨─錦英苑─恒安邨─耀安邨

西田購物優惠日

日期：今日至11月26日（星期一）

時間：11:00am-10:30pm（今日）
12:00nn-10:30pm（星期五至一）

地址：沙田新城市廣場第三期2樓及3樓

查詢︰26340018