上海拍劇三寶隨身
陳小春煮臘味解鄉愁

蘋果日報 2002/01/11 00:00


陳小春每次出門工作,必定會帶備臘味、手提Hi-Fi及私伙牀單,而他亦會將房間改變成為自己的「臨時住家」。他日前在上海拍劇時,所入住的賓館亦不例外,房間內擺滿私伙日用品,更充斥着陣陣臘味飯香。
記者盧雪琪、王光鴻上海直擊
陳小春現正身處上海,拍攝由韋家輝監製的新劇《有情有義》,他近年常返內地工作,少不免患有思鄉病,小春為解思鄉之苦,故近年出門必定帶備三件物品,就是一部手提Hi-Fi,臘腸臘肉和私伙牀單。

工作至凌晨
小春在上海工作期間,入住一間名為「上海地鐵培訓中心」的賓館,想不到平日大男人的他,每日工作至翌日凌晨時份,仍有興致跟工作人員返回賓館玩「煮飯仔」,原來小春每次親手所煮的,都是獨沽一味的臘味飯。
小春表示離鄉別井數月,全靠一碗臘味飯才令他有回家的感覺,他說:「以前喺外地做嘢,由朝拍到晚,連行街都冇時間,返到酒店就對住四面牆,好鬼苦悶㗎。所以每次食碗臘味飯,我就覺得好似返咗屋企咁,冇咗喺異鄉嗰種痛苦。𠵱家每次出門,我都一定帶備好多臘味,尤其臘腸喺身。至於部Hi-Fi就係用嚟解悶,佢跟我走天涯已經一年囉。」

牀單夠香豔
而小春解決思鄉病的另一方法,就是每次都會將酒店粉飾成住家一樣,由房內的聖誕裝飾,到牀頭的一幅掛畫,都是小春精心炮製的設計,連香豔的紅色牀單及枕頭套都是小春的私伙。他說:「所有日用品統統都係我喺屋企帶過嚟,咁樣就唔覺自己喺外地。」
至於小春在新劇《有情有義》中,將會跟馬來西亞演員李明順演一對兄弟,女主角則是來自新加坡的女星范文芳。