林家一門四傑，「香江才女」林燕妮上周四因肺癌於養和醫院離世，林燕妮有三個弟妹林振強、林振剛及林雁妮，妹妹雁妮早於1981年因淋巴癌離世，林振強和林振剛患淋巴癌於2003年離世。

細妹林雁妮畢業於史丹福大學環境工程學碩士，林燕妮同林振強生前最錫細妹雁妮，林振強曾有一段長時間喺美國照顧患病細妹，感情至深，後來返港，雁妮臨終時，林燕妮正回家梳洗，只有林振強陪伴在側。妹妺患癌早夭，年僅28歲。

噚日傳出林燕妮離世消息，無綫於今日凌晨播出《懷念林燕妮 向世界出發》，林燕妮喺節目中講到妹妹年輕時患淋巴癌病逝，林燕妮雙眼通紅說：「我妹妹好靚，全屋最靚係佢，佢好鍾意嗲我，成日叫我買嘢，『家姐我要呢樣、我要嗰樣』，我都買俾佢，妹妹刁蠻同惡，佢讀史丹福大學，非常多男仔追。」

「妹妹葬禮喺香港舉行，有兩套衫係我同佢一樣，粉藍色係我買，其實佢高我少少、膊頭橫，當時我媽話着呢套啦，你買俾佢，我睇住殯儀館啲人幫佢着衫同化妝，我妹條眉生得好靚係唔使畫，長眉入鬢，個化妝師拎支絨頭筆一下畫落去，我即話『喂!唔可以咁』，但化妝師話畫咗落去唔抹得，就照幫佢化，我妹妹個樣真係好靚，佢係唔使化妝，個鼻又生得高，我唔滿意個化妝，叫蓋棺唔好瞻仰遺容。」

其實林燕妮不時在專欄中講起細妹雁妮，雁妮接受第一次電療時，唾液腺損毀，成日覺得口乾，失去大部份味覺，只覺得家姐煮嘅嘢係好食，當時雁妮有一個外籍男友，未想到雁妮癌細胞擴散到子宮，影響生育，外籍男友向雁妮講自己想要有孩子嘅完整家庭，就提出分開(新聞連結： https://bit.ly/2sQ7rOX )。

此外，樂迷紛紛重聽林振強嘅作品，憶起林家嘅兄妹情，聽到《笛子姑娘》不禁流淚。「過去我也曾在此　與她風中相擁抱相注視」…

林振強最愛錫雁妮，1981年為葉振棠《笛子姑娘》填詞，當時好多人以為呢首歌係講男女淒美嘅愛情，其實呢首歌係林振強悼念細妹，歌詞講嘅係兄妹情，「無言的女子」就當年卧病在床嘅雁妮，林振強亦喺《笛子姑娘》手稿右下角親手註上「冇情冇愛字但可以講呢啲嘢」以表達對細妹嘅思念。

網民留言「以後聽著這隻淒美傷感的歌，就會想起林氏一家，感謝林振強寫的所有歌詞」、「林燕妮也上天了，姊妹兄弟重逢」、「四姊弟妹在終於天國團聚了」、「你們一家留給我們最珍貴的作品」、「現在他們姊兄妹弟四人正在另一空間國度重聚，共同細味這歌」。

相關新聞連結：
才女林燕妮肺癌離世 享年75歲
https://bit.ly/2xOHrsC

【一代才女】林燕妮6.26香港殯儀館設靈 無宗教儀式
https://bit.ly/2M4pmdb

【林燕妮病逝】與李凱豪由細玩大 雷頌德：從她身上學懂做人道理
https://bit.ly/2szwh68

生命之曲 妹妺患癌早夭 林振強寫《笛子姑娘》悼念
https://bit.ly/2sQ7rOX

林燕妮細訴洋蔥頭：彌留時刻…難忍男兒淚
https://bit.ly/2kP7NBI

胞弟林振強與弟妹先後因癌症離世
https://bit.ly/2HlCgQC

大弟一句「姐姐救我一命」 林燕妮捐骨髓救林振強
https://bit.ly/2JthvaH