冬菇頭、矇豬眼、小酒凹，係80年代天才童星「小柏林」（鄭柏林）嘅標記，事隔多年，小柏林大個仔嘞，大學畢業後佢投考見習督察加入警隊，上星期學堂畢業，噚日「處男」出更正式成為執法者。
喺學堂受訓大半年，當年面圓圓、成身babyfat嘅小柏林變成鋼條身形男子漢，冬菇頭亦鏟到見青變平頭裝，噚日大約中午12點零鐘，佢身穿白恤衫、一身戎裝同其他10幾個相信係新紮師兄、師妹齊集青衣警署，大班人手持文件夾喺停車場集合，之後坐警方大卡車去葵涌警署報到。
大卡車抵達葵涌警署後，小柏林一馬當先落車，佢由細見慣鏡頭，知道有記者在場拍攝顯得神態自若，冇刻意迴避鏡頭，有個便裝師姐好似驚佢曝光過度，急急將佢拉入警署。其實小柏林今年已經22歲，唔係當年個「豆釘」，之前接受訪問時表現淡定，師姐唔使咁緊張喎！

據了解小柏林現時被派駐葵涌警署，係軍裝巡邏小隊指揮官，要領導一隊人負責巡邏工作，返工第一個星期要認識實際警務工作，暫時應該少啲時間行咇。葵涌警署有個燒烤場，警員休班時會搞BBQ紅酒party，小柏林喺度當更，相信公餘時間不愁寂寞；呢間差館另一出名之處係魔警徐步高都曾經駐守。
小柏林做童星時好多fans，大人細路都鍾意佢，連警隊高層都搵佢做「人辦」，擔任招募學警代言人，不過佢似乎已經厭倦上鏡，坦言對幕前工作冇乜興趣，唔係阿sir叫到都唔想拋頭露面，做代言人怕且只此一次下不為例，第日千祈咪搵佢做《警訊》主持㖭！同好多投身警隊後生仔、女一樣，小柏林話覺得做差人工作刺激又幫到市民，所以決定為人民服務。
八方提醒大家，第日去葵涌行街，或者嗰度街坊見到「小柏林」行咇時，唔好再順口叫佢「小柏林」嘞，佢希望大家叫佢英文名Jacky，或者嗌佢鄭sir更好，事關佢已經係執法者，唔再係《親親孩子天》、《柏林周記》同《晴天、雨天、孩子天》劇集中嘅童星，真係犯法，叫佢小柏林都冇得甩身，就算叫鄭sir都冇面畀。

mailto:[email protected]