爾冬陞（小寶）同王海峰嘅星皓電影公司02年12月約滿之後，小寶入稟法院告呢間公司欠佢人工60萬，不過星皓就話小寶冇履行合約開拍《三少爺的劍》，又冇兌現同星皓電影開拍幾部戲，所以告上法庭要求賠償600萬，最終法官判咗小寶贏，星皓電影連埋堂費大約要賠280萬出嚟。

上門查數

而星皓電影早前向公司註冊處要求清盤，換言之小寶啲賠償肯定凍過水。星皓電影雖然清盤，但星皓娛樂會如常開拍新戲，公司發言人李小姐接受訪問時話：「公司最近進行重組，有內地同台灣資金入股，所以星皓電影我哋決定唔要啦！咁咪自己清自己盤，根本就同小寶單官司完全冇關係。」
至於小寶就強調打呢場官司唔係為錢，係為自己聲譽而戰，佢話：「星皓之前搞到報警話我欺詐，咁樣對我聲譽係有好大影響，雖然我唔係完美，但絕對唔能夠容忍俾人話我欺詐，𠵱家法庭已作出公平裁決還我公道，我都好安慰，至於星皓電影清盤後，周五我會以債權人身份上星皓公司查數，睇追得番幾多。」