近期澳博（880）員工曾經發起多次示威遊行、按章工作等工業行動，作為澳博執董嘅「賭王四太」梁安琪當然憂心忡忡，悶悶不樂。
喺呢個時候，竟然有個男仔可以撩到四太心花怒放，四太仲主動邀請對方合照㖭。不過大家咪諗多咗，呢個男仔只係一個細路仔咋！
話說噚日花旗香港與保良局合辦一個理財教育活動，差唔多有過百名小三、小四學生坐定定做現場觀眾，四太梁安琪就以保良局主席身份參與活動。

邀請合照食檸檬

經常見報嘅四太似乎好得細路仔歡心，有個細路仔就口花花咁撩四太，見四太行過佢身邊，就賣口乖咁大讚四太「好靚女」，仲話「我認得你呀，你唔係（保良局）副主席咩？」四太聞言，笑笑口咁答佢：「我𠵱家係主席呀。」
呢位小朋友跟住好似背熟書咁繼續對四太話，「你之前係平民，之後就做咗總理、副主席……」四太見到呢個細路咁精靈，即刻甜笑，仲忍唔住搵佢合照，話要「記住佢」咁話。
照計四太開到聲話要同邊個合照，都冇人敢say no，偏偏呢個細路就扭扭擰擰，話唔制，要四太𠱁番佢轉頭：「影啦，到你大個仔睇番喇！」咁又係喎，四太喺政商界一向都長袖善舞，點知佢日後做到乜嘢位置，呢個細路長大後拎住呢幅相實有紀念價值嘅。
講番呢個活動，其實係花旗由2005年開始舉辦嘅兒童理財活動，主要係以話劇形式教小朋友理財，至今喺唔同學校做過450場表演，超過11萬名學生睇過㗎喇。

李華華
mailto:[email protected]