JW(王灝兒)將於明年一月喺紅館舉行演唱會，今日佢就喺社交網站貼咗演唱會嘅poster，今日傍晚JW就出席品牌活動，講到明年開演唱會，佢話：「非常之咁開心，老闆同我講會將(海報)貼去紅隧，好想去睇，一陣做完嘢會即刻過去睇。細細個睇concert會見到有其他poster喺度，o依家到自己所以好開心，好多謝老闆同贊助。」

至於會唔會擔心演唱會銷情？JW就話：「唔擔心，有得開已經好開心。o依家已經開始排練，練下啲彈性同柔軟度，因為我條尾龍骨有啲彎，每次拉筋嗰陣都好似去到生命邊緣咁，每次見到自己進步好開心。」問到會唔會請嘉賓，佢就話張list好長，要等公司confirm咁話。