好多年前，我以體育記者身份，喺一個商場show同阿叔做訪問，訪問嘅內容已經忘記得一乾二淨，只係記得我哋喺後台搭建嘅小帳篷內傾偈，完成咗工作之後，阿叔問我幾多歲，當時我仲可以自豪咁講出自己嘅年紀，然後佢問我係咪好鍾意做記者？接住落嚟嘅十幾分鐘，阿叔一路講佢對體育同埋傳媒嘅一啲睇法，臨尾拋低一句：「如果你鍾意做呢行，就坐定定做落去，咁樣先可以喺你個行業做到『專』，同行先會記得你。」

雖然阿叔只係淡淡然咁講，但呢句說話經常喺我腦海出現，所以我做咗一個好重要嘅決定，就係轉行。寓工作於興趣係一件樂事，但當你發現此路不通，就係時候要求變。肯變未必搵到一條大道通往羅馬，但唔肯變，就注定要困喺死胡同。

喺轉工轉行嘅路上，我都唔係一帆風順，記得初初由體記轉做文職，見工時聽過好多質疑嘅聲音，好好彩最後都遇到肯畀機會我嘅人，其實轉工轉行永遠都唔會太遲，真正嘅遲，係你再諗多幾年，到時你受到嘅質疑會愈嚟愈多，愈嚟愈尖銳。

阿叔離開咗九年喇，不過我一直記住佢同我講嘅說話，因此之後搵到一條行得舒服，而且有心發展嘅路，我真係開始坐定定，攞到個定位，再作出更遠嘅規劃，至少你而家講起辦公室或者招聘嘅話題，都會略略諗起聶瞳。我相信每個人都有一條屬於自己嘅路，希望大家經歷完摸索階段之後，都可以坐定定，只要去到羅馬，遲到總好過冇到。
＿
專欄作者簡介：
辦公室日報　聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/

探索驚奇精彩的 wONdEr 故事，請LIKE 我們的Facebook Page，並設定為「搶先看」： https://www.facebook.com/wondermedia.hk/