現年40歲嘅周迅，上年7月同44歲美籍華裔演員高聖遠喺杭州《關愛特殊兒童ONENIGHT公益晚會》完騷後，現場舉行婚禮，兼網上直播，當時周迅同高聖遠喺台上，先十指緊扣出場，喺在場多位觀眾、圈中好友及眾多網民見證下，交換戒指及甜蜜咀嘴，兩人正式成為夫婦。

內地藝人周迅今日被爆懷孕，據知周迅婚後不設防，終於造人成功，日前被內地媒體影到周迅兩公婆喺北京某間火鍋店，同家人、好友陳坤及黃覺開餐，傳佢哋兩公婆同好友公佈喜訊，周迅著上一身鬆身衫護肚，老公高聖遠更全程護妻，據知周迅目前要好好安胎。

有傳上年12月，周迅已被內地報道指佢有咗，當時出外要由老公小心呵護。不過，暫時未見周迅工作室官方微博就此事作出回應，未知係唔係目前未夠3個月，暫時唔同得大家講呢?