當年今日

離娛圈27年 曾遭倪震嫌醜激到喊
張麗瑾為供仔女讀U 變師奶股神

蘋果日報 2018/05/25 00:00


【《蘋果》專訪】歌曲《留給最愛的說話》能勾起不少80年代尾集體回憶。主唱的張麗瑾不是唱家班,不是靚女、DJ出身的她,更曾被倪震笑醜樣激到喊!不過,逃離娛樂圈27年的張麗瑾,揚言回憶中沒有不開心的事,又爆為供子女升學變成師奶股神,現在有三層樓加兩個車位揸手。
商台DJ出身的張麗瑾,當年在電台負責節目《日本流行情報》,是80年代日本文化代言人。然而,其夥拍軟硬天師主持的節目《飛越癲狂院》同樣大受歡迎,一首跟廣播劇同名的歌曲《留給最愛的說話》,更加成為80年代尾的集體回憶。
empty
為應付子女升學,張麗瑾當年認真學習投資,目前持有三層樓及兩個車位。攝影:陳俊強
empty
張麗瑾曾夥拍葛民輝(左)及林海峰做電台節目《飛越癲狂院》。互聯網圖片
empty
叫張麗瑾回想在娛圈的日子,她表示一點都沒有不開心事。
empty
同靚女周慧敏結婚的倪震,有指當年話張麗瑾醜激喊女方。資料圖片
自知唔靚女
離開電台後,張麗瑾曾跟倪震主持亞視節目《熱門週末派》,該節目導演蔡錦源在專欄爆料,指張麗瑾曾衝出錄影廠哭訴:「我是醜,但也不用這麼拿我來說……」日前,張麗瑾接受《蘋果》專訪,問她當年是否被倪震激喊?她厚道說:「冇呢個印象喎,倪震口花花嗰啲,有時講嘢唔就你女仔,佢當我男仔,唔靚女有乜所謂,我知自己唔靚女,我重視個心係善良,男仔梗係鍾意黐靚女,我冇所謂,不過我諗我唔係好適合去電視圈子。」
現年逾50歲的張麗瑾逃離娛樂圈已27年,她表示回想中沒有不開心的事,又指所有事都是紀念。她說:「多謝上天安排我試過呢個經驗,唔好要求紅透半邊天,一首歌hit到咁,一個節目hit到咁,但如果可以再做一個節目,我諗都鍾意嘅,嬉笑怒罵分享人生真諦,將眼光睇遠啲,心情變靚啲。」
於93年結婚,老公黃永恒任職上市保險公司總經理,兩人育有一子一女,今年踏入銀婚25周年。張麗瑾兩夫婦跟升斗市民一樣,為供子女到外國讀書,想盡辦法搵錢儲錢,張麗瑾更因此成了師奶股神,她笑謂:「我老公完全冇錢,佢由messenger做到𠵱家manager,佢係一個好努力嘅人,我哋夠生活就算,到要供仔女去外國讀書,計吓條數,嘩,唔掂喎!於是要諗方法搵嚿錢,有乜可以好快呢?就係做投資。」
empty
張麗瑾和老公之前慶祝銀婚紀念。
empty
張麗瑾育有一子一女,女兒都已經大學畢業。
點都要儲錢
張麗瑾續說:「成日去聽投資講座,又投資股票、樓市,𠵱家有三層樓,車位有兩個。」說到投資秘方,她不介意公開:「唔使全部用晒自己銀包嘅錢,借囉,真㗎,我唔係呃你,借咗錢返嚟,千祈唔好要嚟買嘢,用錢搵錢,講穿即係買股票,可以將股票按畀銀行,佢就會借番一半嘅錢畀你,咁你多咗嚿錢活用,我試過用呢嚿錢買車位,半年賺十萬。」
目前在元朗手持三層樓,張麗瑾坦言:「因為我未賣,賺幾多唔可以作準,但起碼都有九百萬,不過有一半係欠銀行。」她又分享投資心得:「有啲人好驚借錢,睇你點借,喺銀行借五、六萬,識投資每個月大概可賺一千蚊,借六個月當利息收一千都賺咗五千,唔好睇小呢五千,啲錢係一滴一滴積落嚟,但首先要儲錢,冇錢空談。」
採訪:余燕儀