近日自欄后呂麗瑤自揭遭前校隊教練性侵後，「性侵」話題成為社會熱話，就連「十優港姐」麥明詩亦身受其害，今日下午6點45分，麥明詩喺fb開post以千字文自爆：「相信唔少女仔都曾經遭受性侵犯，我亦都唔例外，仲要係唔止一次添(o添)。」

佢仲講到明：「有啲係我阻止唔到；有啲係之後諗番，如果我醒覺啲我可能可以阻止到... 受害者能夠鼓起勇氣面對呢件事，知道錯唔係自己，呢個係第一步。」而麥明詩千字文未有交代事件經過，最後只係以「P.S.」交代事發時身處內地，香港法庭冇司法管轄權，所以未有採取進一步行動。

麥明詩文中更多以法律角度談論喺法庭上舉證「性侵」難處，而最後佢仲話：「我唔係需要打贏一個男人；但係只要製造到一個逃走嘅契機就已經足夠。於是幾個月前我決定咗要學柔術。」