咖喱牛腩:搵艾迪巴約睇路 - 牽牛

蘋果日報 2015/06/25 00:00


同戰友咖喱傾過,想講吓今夏自由身球員有咩筍貨,不過小弟就有啲取巧,想推介嘅艾迪巴約(前),嚴格嚟講唔係自由身,不過比免轉會費嘅球員仲筍,熱刺仲肯補貼人工,拎幾萬周薪出嚟就簽到多哥球王,真係啱晒中小型英超班。
作為阿仙奴球迷,對艾迪巴約倒戈入波兼喪奔50碼去阿仙奴球迷區慶祝,呢個情景又點會忘記,不過小弟真係唔記仇,真心覺得艾迪巴約係筍貨。佢同熱刺仲有一季約,熱刺都唔係好打算起用佢,與其白支10萬鎊周薪畀佢,下放佢去預備組,又驚佢教壞細路,當然借佢去其他球會仲好,而且據報熱刺願意承擔一半人工,如果牙力夠,屈到熱刺出人工比例多啲,仲更加着數㖭。
當然啦,呢個世界邊有咁大隻蛤乸隨街跳,唔通當打嘅美斯C朗會外借畀人咩!艾迪巴約梗係有啲缺點,講開佢啲麻煩嘢,確實係多,最新就爆咗啲類似《真情》劇情嘅故仔,艾迪巴約好豪咁講孭起多哥屋企人成家,點知屋企人反駁講艾迪巴約好耐都冇拎錢返嚟,同傳媒講自己好孝順都係吹水。
小弟又唔係道德X,艾迪巴約孝唔孝順,同踢波好唔好冇咩直接關係。講番佢每次轉會,頭一兩季都真係好對辦㗎,加盟曼城如是、外借去皇馬如是、加盟熱刺如是,不過搵到份長約先開始現形。艾迪巴約本身都31歲,同熱刺剩番一年約,再唔振作唔通真係退休咩,所以可以預期新一季,佢去到新球會都真係會幾搏命,不過小弟就奉勸新球會,千萬唔好畀張長約佢,好似雲格一年一約咁,先可以治到艾迪巴約嘅懶散症。
文:牽牛