猶記得今年金像獎頒獎禮，由三位重量級嘉賓：梁小龍，陳惠敏，盧惠光頒發最佳動作獎，三人一出場，妙語如珠，還講到成龍。對話回帶如下：

梁小龍：其實今晚最主要嚟呢度，係頒呢個金像獎。
陳惠敏：咩金像獎呀？
盧惠光：小龍哥，有幾型呀？
梁小龍：哈！奧斯卡都冇呢個獎呀，你話型唔型呀？
陳惠敏：小龍呀……呢個獎最近唔係成龍哥攞咗㗎咩？
盧惠光：哦……最近大哥攞嗰個呢……係成就獎嚟嘅
梁小龍：唔好講咁多廢話喇陳：即係老人獎啦！

玲瓏剔透嘅對白，可見三人與成龍關係。

而盧惠光同成龍嘅恩怨，可以追溯到多年前林鳳嬌取代陳自強為成龍嘅公司揸旗後叮走盧惠光，盧惠光當年哭訴遣散費不夠10萬。(新聞連結： http://bit.ly/2oPcwHu )

事緣就係，當年成龍因為集中火力喺大陸發展，唔止將經理人陳自強炒魷，更指派「龍嫂」林鳳嬌接手出任「成龍影業」及「JC Group」董事及秘書，而護法之一、跟隨成龍30年嘅盧惠光，亦慘食「無情雞」，最終只獲10萬賠償，當時盧惠光已年近半百，被炒後一度賦閒在家無着落，更遇財困，又要照顧兩子，都好難捱。

盧惠光視成龍為好兄弟，超時工作冇假期，甚至連前妻黎淑賢待產生第一個兒子時，亦可以因成龍一個電話置之不理。難怪當年不少好兄弟背後都話成龍不顧情義。

當時傳媒向盧惠光求證事件：「冇留意，我冇咩講。30年前已冇嘢講，依家都冇。」

不過今日盧惠光到台北拍攝網絡電影《浪花嬌娃》，被問到成龍事件解決了嗎？盧惠光話：「沒有，從來沒有解決過，因為從來沒有發生過。」

盧惠光一直唔肯講同成龍關係，今日佢終於透露，當日離婚，要帶兩個孩子，行唔開：「大哥要去北京發展，我不可能跟他去北京，因為我有兩個小孩，他現在拍電影也有請我拍，回來吃飯也跟我們一大堆人一起吃飯，沒有什麼外面傳的事，哪可能，這個圈很小，永遠是朋友沒有敵人。」

問到與成龍之間有發生不愉快事件，依家解決咗未？盧惠光即謂：「從來沒有解決過，因為從來沒有發生過。」

至於傳聞中的俾10萬蚊打發，盧惠光稱：「10萬塊他應該給我，很多次，他應該給的已經給完了，不是給10萬，是給很多。已經過了十幾年，放過他和我吧。」

盧惠光仲話，依家返香港都會同成龍食飯，又透露依家有個穩定交往嘅圈外女友。問他會否再婚？他笑：「婚姻是愛情的墳墓啊，順其自然吧！」