阿董密鑼緊鼓搞部長制，原本益咗班二線同三線政務官，增加佢哋嘅升職機會，之但係八方有日同高官老友傾偈，先知個高官老友原來唔係咁開心，因為首長級第八級高官不再是主要官員後，成班鬼佬高官即刻大解放，齊齊同班本土高官爭上位。
屈指一算，煲呔曾愛將米老鼠盧維思，公屋短樁事件後仍屹立不倒嘅苗學禮，香港駐布魯塞爾歐洲共同體特派代表翟信賢等，全部生猛番晒；所以話啲位係就係多咗，但唔見得升官機會高咗。
正所謂風水輪流轉，回歸時因為唔准外籍高官出任主要官員，差啲搞到班外籍高官同政府打官司；事隔四年多，因為搞部長制呢單嘢，間接幫外籍高官解封，令佢哋可以更上層樓。
老友重多口話，米老鼠早知如此，就唔使搞歸化中國籍都可以升官大吉；不過八方又唔係咁諗，話晒都叫做名正言順向部長進發吖，你話人生幾充滿希望。


E-mail：[email protected]