網絡世界fake news滿天飛！最近藍絲group最廣傳嘅一單消息，就係武漢肺炎來自美國，點知自稱喺英國倫敦大學法學學士畢業、之前喺區議會選舉落敗嘅工聯會小花陳穎欣（圖）竟然信到十足，仲拍片「分析」埋專家報告，連專家一早已經公開澄清咗係曲解都唔知。

盛傳陳穎欣嚟緊有機會代表工聯會出戰勞工界功能組別議席，點知未出戰先嚇親人。話說佢之前就喺YouTube上載咗條片，內容引述劍橋大學嘅報告，質疑武漢肺炎病毒源頭唔係嚟自武漢，反而嚟自美國或者澳洲。傳真社就此問過陳穎欣所引述嘅劍橋專家團隊，團隊直指陳對報告有誤解，事實係「有數據強烈說明病毒爆發初期是在東亞人之間傳播，尤其中國人」，同陳穎欣所講嘅完全唔同。

傳真社話已經透過facebook、YouTube、WhatsApp通知陳穎欣影片內容有誤，不過陳穎欣都係冇回覆。其實早喺傳真社之前，劍橋專家團隊接受美國之音訪問已踢爆大陸報道歪曲報告，好多傳媒亦有引述報道，陳穎欣莫非冇睇網媒同報紙，定係佢只睇大陸傳媒？