梁朝偉背住愛妻劉嘉玲攬其他女人，好明顯係拍足幾年嘅《一代宗師》劇照，偉仔攬住唔放嘅，就係佢喺戲中嘅老婆宋慧喬。

今日先至有報道話，盛傳宋慧喬因拍得太耐、仲要係等多過拍，發火玩劈炮，王家衛一怒之下，將佢嘅戲份大刪，改為章子怡坐正；更盛傳宋慧喬將缺席明年嘅柏林影展。咁啱報道一出，電影公司就發呢兩張劇照，未知是否用行動闢謠。

至於部戲嘅上映日期，電影公司話就話係明年1月10號，但行內盛傳部戲未剪完，好可能二月先上到。