發哥周潤發夠專一，成個衣櫃得一款衫，顏色係佢喜歡的黑。

劉青雲呢，唔止專一，啲冧女橋都好得！

去年，劉青雲憑電影《竊聽風雲3》奪最佳男主角，領獎時發表愛妻宣言，佢話：「多謝我太太（郭藹明），女性觀眾鍾意聽，每次當我揸住太空船，飛到宇宙唔知邊度，你總有辦法令我安全返回地球。」台下嘅郭藹明已淚如泉湧。

冧呢？未住。早於2014年10月，劉青雲仲做咗另一件冧死郭藹明嘅事，就係以3,280萬，購入西貢西沙小築E型雙號屋。實用1,519方呎（建築面積1,994方呎），原業主2009年以1,960萬元購入。過去劉青雲夫婦喺投資物業方面都大有斬獲，同年5月以2,050萬售出薄扶林貝沙灣1期3座低層B室3房單位，較2006年買入價1,030萬，高出成千萬！不過，西沙小築呢間屋，劉青雲係用嚟冧老婆。

事實上，青雲兩公婆喺西貢物色新居已多時，但一直未搵到。前年難得西沙小築有人放盤，郭藹明一望到個無敵海景已經深深愛上，馬上扑錘成交。但因為間屋比較舊(83年入伙)，所以成間屋大翻新，作為送俾太太嘅禮物。

送dream house冧太太，未夠，今日有周刊報道指，劉青雲仲sweet到，去年5月開咗間私人有限公司，同太太聯名嘅，間公司英文名叫Little Starship Productions Limited——中文名即係：小飛船製作有限公司。

就係嗰架由劉青雲駕駛、郭藹明令其安全返回地球嗰架太空船。

真係好man！