viuTV開拍《G-1格鬥會II》，最後8名選手今日就去到日本東京都大田區，搵咗一間MMA嘅拳館做訓練，一班女仔就兩個人一組，做啲基本嘅訓練，麥紫莉同佢對手練鎖技嘅時候，麥紫莉就好緊張，但示範動作都叫做暢順。

本來大家都係性感嘅運動裝上陣，但麥家琪示範鎖技嘅時候，就着咗件外套，話想大家留意佢嘅動作，但佢嘅動作就唔係好流暢，好多時都要教練再教多佢一次。

麥家琪話自己訓練好似平時自己打泰拳咁，不過始終都同MMA唔同，有啲動作都唔係好熟，都算係一個挑戰，但聽日嘅比賽就冇諗有冇信心，因為好多嘢都要睇臨場發揮。佢仲話：「以前我先生畀啲拳賽我睇，我會諗乜唔痛咩，但到咗今日自己都打埋一份，可能人都係想挑戰自己。我覺得MMA比較有興趣，好玩啲。」

問到會唔會擔心拳怕少壯，因為一班對手都好年輕，42歲嘅麥家琪即刻話：「啋過你，我都唔係大佢哋好多啫，我智商20歲咋，我同小麥睇落都差唔多，不過老公同小朋友都有擔心我會受傷。」