谷草係方嘉柏主場係馬迷都知，睇番佢近十季谷草成績，最少一季係05至06馬季，但亦交出19W，於所有馬房中排名第二，其餘九季都起碼贏20W或以上，谷草排名亦非冠即亞。方仔谷草成績咁巴閉，當然亦有不少數據提供俾大家參考。
最煞食招數之一係田轉谷之上陣馬，剛季最佳例子莫如「文藝復興」，雖然於田草1600米打開在港勝門，但翌仗首次跑谷草，一樣難佢唔到，壓倒「安荃」再下一城。而其他谷草頭馬如「勝哥兒」，更於田草連跑三仗後，轉跑谷草便一擊即中，所以新季不妨優先留意方廐田轉谷之上陣馬。
另一類要留意嘅馬係谷草增程馬，如剛季「上進」便先於1000及1200米熱身四仗後，第五次上陣突然增程跑1650米，即爆10倍冷門。新季此類方廐谷草增程馬，不失為博冷W佳選。方仔仲有另一絕招部署馬匹在谷草搏殺，此招便是匆出馬，如剛季之「十二門徒」及「騏名燈」，俱是相隔一周或以內在谷草郁手，雖未能勝出，但分別跑入第二名。