呢輪時勢唔好，雞犬不寧，個天又陰陽怪氣咁。噚日兩點鐘左右，正當八方食緊飯嘅時候，就收到好朋友James急call，問我睇唔睇到海市蜃樓。八方當時人在中環，望上天淨係見到一嚿嚿雲。八方問佢係唔係視覺失調，叫佢得閒去check吓對眼。
點知James唔忿氣，即時影低張相，電郵過來畀八方鑑賞。咦！好驚喎，點解維港望上去西天，有座山喺堆雲上面飄飄吓咁嘅！James喺海港城寫字樓十幾樓返工，佢話食完飯一返到去，望出窗口就見到呢個奇景，全個辦公室嘅同事都紛紛拎起手機影相，啲見識少嘅OL仲𠵱嘩鬼叫，興奮過喺路邊執到個Prada手袋。
James懷疑呢個係海市蜃樓現象，八方就本住共產主義唯物論嘅精神，send張相去天文台求證。冇幾耐，一位總科學主任就一盆冷水淋過來。佢話呢個唔係蓬萊仙境，只不過係大嶼山東面嘅大東山、蓮花山一帶山頂啫。原來當時維港低空有雲霞積聚，遮去遠處山巒嘅半山部份，加上連日風雨後視野較遠，所以平日喺維港望唔見嘅大嶼山，呢個時候都睇得到咁啫。

讀者項明生提供圖片（攝於尖沙嘴）

Shot壹Shot歡迎讀者拍攝相片投稿，相片獲刊登薄酬100元。
投稿請提供拍攝地點、姓名及聯絡電話。電郵：mailto:[email protected]