34歲嘅蔡卓妍(阿Sa)，感情路上並唔平坦，曾與鄭中基離婚，後與陳偉霆發展姊弟戀就未能開花結果，久旱逢甘露嘅阿Sa日前終於有着落，承認同「麻將館大王」太子爺石恆聰（Anthony）拍拖。今日更有周刊報道指，阿Sa最欣賞Anthony嘅勤力上進。

日前阿Sa被爆戀上「麻將館大王」太子爺 Anthony，即係連詩雅嘅舊愛，事後阿Sa出席活動時，就連講五次好開心作回應( 新聞連結： http://bit.ly/2twqQ9q )，今日就有周刊報道，引述知情人士消息所指，阿Sa其實同Anthony嘅戀情只係開始咗個多月，而Anthony係家中嘅長子，負責打理家族生意，返朝九晚五，生活好有規律，而Anthony要處理家族嘅房地產生意同物業管理，所以經常要出埠公幹；同樣阿Sa亦經常要到唔同地方工作，好似阿Sa下月就要到加拿大拍戲一個月，八月返港亦要繼續為電影開工，未來兩個月都會好鬼忙，雖然聚少離多，反而就更珍惜相處嘅時間。

講到阿Sa同Anthony係點樣撻着，知情人士話阿Sa同馬天佑係好兄弟，收工就鍾意打俾馬天佑，約佢食飯，就係咁阿Sa同Anthony而認識，開頭佢哋都冇乜傾計，亦冇交換電話，後來見多咗先開始傾計。知情者仲話，當時阿Sa同Anthony都係單身，兼且佢哋都曾經歷情傷，所以特別投緣，一拍即合。Anthony比阿Sa大一歲，知情人士就話，佢哋都覺得年紀唔細，對呢段感情都好認真吓，所以就更加希望大家能夠俾啲空間佢哋好好發展。另知情者話阿Sa最欣賞男友孝順、勤力同上進，Anthony除咗覺得阿Sa好有魅力，而魅力亦源自佢對工作嘅熱誠同堅持，同好欣賞阿Sa獨立同有思想。

對於阿Sa被影到去Anthony屋企，而冇俾男友到佢香閨，知情者就有咁嘅解釋，話因為Anthony同兄弟姊妹住，而阿Sa覺得多啲人一齊玩會開心啲，所以就揀咗去男友家作客。另外，知情者又透露，熱愛運動嘅Anthony亦感染到阿Sa愛上做運動，但礙於阿Sa怕曬，所以佢哋就會揀咗唔曬太陽，而係曬月光，夜晚先去跑步同踩單車。