東亞銀行（023）舊年業績有起色，帶挈「寶哥哥」主席兼行政總裁李國寶人工升六成，花紅足足多三倍。
東亞前兩年盈利倒退，連帶寶哥哥花紅都分少咗。不過舊年東亞賣咗卓佳，加上業務轉型唔錯，全年盈利勁升1.5倍至93億元。就算扣除卓佳溢利，核心業務盈利都有63億元，升80%，係自2013年以來第二高盈利紀錄，唔怪得董事酬金可以加番。

花紅2,310萬升3倍

根據東亞最新年報，寶哥哥舊年酬金總額達到4,690萬元，增幅超過六成，算係同盈利增長同步。單單計酌情花紅，寶哥哥舊年袋2,310萬元，相比2016年只有550萬元，足足升咗3.2倍。薪金同津貼等方面，就略加20萬元至1,090萬元。
至於佢兩位公子，副行政總裁李民斌同李民橋，人工加幅雖然無爸爸咁多，但舊年都齊齊加薪超過四成，酬金總額達到1,330萬元。主要都係來自酌情花紅大增3倍，由2016年嘅120萬元，加到舊年500萬元。
除咗三父子有得齊齊加薪咁開心，其他非執董同獨董大部份袍金都有增長，舊年整體董事酬金總額達到8,140萬元，比較2016年5,500萬元，增幅都有48%㗎。

李華華
mailto:[email protected]