北京發公函要「奶媽」林鄭月娥就取締香港民族黨呢單嘢交報告，做法極之唔尋常，北京似乎已經對「好打得」嘅奶媽失去咗耐性。打工仔應該最明白呢個道理：你老闆無啦啦咁公開叫你交報告，肯定有嘢唔妥你，先要你自我檢討，睇下你醒唔醒目，交唔交到啲嘢出嚟。北京就係要奶媽喺保護國家安全上面做啲嘢，唔理係立廿三條、修訂逃犯移交法例，定係再推國教，抑或取締多幾個港獨或本土組織，總之要有嘢做到畀佢睇，唔係要佢出聲，你先識去做嘢咁被動囉。

好多人都話，即使過去發生佔中同埋「旺角暴亂」兩單咁大嘅嘢，北京都無公開要求過特區政府交報告。雖然取締香港民族黨涉及國家安全，但呢件事始終係香港內部事務，關乎執法同司法。再加上香港民族黨呢單case，都仲未完結，之後仲有可能會有司法覆核，北京呢次做法咁高調，點會唔畀人覺得佢哋干涉緊香港內部事務，同埋公開向香港法院施壓？咁做同踐踏一國兩制無分別囉。

如果你話呢啲咪就係奶媽之前所講，部份港人不能完全理解一國大於兩制嘅「憲制新秩序」囉，咁北京真係好粗暴同野蠻咁將呢個新秩序演繹咗出嚟。此例一開，係咪以後但凡北京睇唔過眼嘅事，只要俾佢哋講成涉及一國，就可以叫特區政府交報告？又或者特區政府以後覺得嗰單嘢只要涉及一國，係咪就要識趣主動向北京交報告？咁一國兩制真係可以收檔。

仲有嘅係，點解北京急住喺呢個時間，咁公開、咁高調、咁官腔咁向特區政府發公函，而唔留番喺就快召開嘅全國兩會嗰陣，等奶媽北上與會先當面向佢提出？事實上，奶媽日前突然自爆收到公函，之後官媒新華社就將公函內容公開，全部嘅嘢都係高度嘅配合，呢個好明顯係北京想講埋畀香港人知道，奶媽呢鋪走唔甩，無得再採取拖字訣，有必要就廿三條立法真係做啲嘢。公函裏呢幾句：「維護國家主權、統一和領土完整，是香港特別行政區政府的職責，也是包括香港同胞在內的中國人民的共同義務。」已經講得好清楚，即係叫港人硬食，唔好再作無謂嘅反抗嘞。

唔知大家仲記唔記得，舊年12月奶媽上京述職，習帝坐喺紫檀木龍椅上讚佢「志不求易，事不避難」，當時外界解讀此番話其實「有骨」，習帝真正嘅意思係要奶媽「不避難」咁完成國家所交付的各種任務。而今次發公函嘅訊息清楚，好明顯就係催促奶媽做嘢。道理好簡單，就係你老闆要你交報告，又點會只係expect你淨係做檢討，唔講埋將會有啲乜嘢要做呀。講到明就譖啦！

難怪有評論咁話，北京已經撕開咗《基本法》第48條嘅封印，只要話係涉及一國或國家安全嘅事，就可以直接落order要特首執行有關指令。正所謂「一件污，兩件穢，三件無所謂」，呢種做法，相信陸續有嚟。

花生評論員

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb