香港小巨肺Celine（譚芷昀）只係年僅9歲，近日已經參加美國才藝節目《全美一叮》（America's Got Talent），短短嘅preview瀏覽數字驚人。譚爸爸話冇預計咁多人睇：「今朝起身先知點擊咁好，Celine有上網睇，但睇得最多係佢妹妹，睇咗足足有20次。」Celine片中跟評判對答如流，表現淡定，譚爸爸大爆Celine出台一刻都冇緊張，輕鬆出場，譚爸爸就讚乖女有經驗。

Celine從3歲開始學唱歌，前年更衝出亞洲，成功殺入才藝真人騷比賽《全英一叮》（Britain's Got Talent）第二階段賽事，呢一切，都要多謝Celine有個唱歌老師爸爸譚順生栽培。

譚爸爸今日接受《蘋果》訪問，佢話喺《全英一叮》後就開始為《全美一叮》備戰：「訓練咗足足兩年，因為Celine好享受唱歌，每日都練聲，每星期至少會練習20小時，每日佢會自己練。」

「去年11月我哋都開始為呢次《全美一叮》訂出編排訓練，雖然辛苦，但Celine係開心，佢享受唱歌，佢會管理好自己時間。」譚爸爸話Celine讀國際學校，鍾意返學同做功課，譚爸爸認為唱歌有助囡囡快樂成長：「有咗唱歌呢個目標，佢會有動力向前跑。」譚爸爸仲話Celine參加完《全英一叮》，已經話好想再踏上《全美一叮》嘅舞台。

Celine小小年紀都識養聲，自動自覺唔食傷聲食物，譚爸爸話：「Celine冇食薯條三年，不過有時佢表現好，我會獎勵佢，有時買包畀佢，Celine食兩條就唔食。」譚爸爸讚Celine勤力，每日都會練丹田、開聲、練琴，譚爸爸希望囡囡將來可以自彈自唱：「好似G.E.M.（鄧紫棋）咁，Celine鍾意Celine Dion，佢都鍾意G.E.M.同容祖兒。」

譚爸爸好鼓勵Celine聽唔同歌手嘅歌曲，佢話：「我畀好大自由度佢去揀喜歡嘅歌嚟聽，我會同佢分析番邊啲啱佢唱。Celine上YouTube聽歌，佢有時睇到MV有色情嘢，佢會自動刪走，睇到歌詞有唔好文化，佢又會唔聽，我好放心畀佢自己揀。」