今期三場國際二級賽，短、中、長馬王級良駒，幾乎全列陣，下月正本戲才是目標，究竟有幾多馬「有心有力」確實難知。另外，場地偏差是另一重要影響因素，10月8日的B加2跑道大利內叠前領，今次會點？也要跑幾場才知。

第五場三班1400米：揀齊前置、居中及後上，那怕偏差怎樣？「皇仁大師」、「翔惑」應會前置，「勝得威」居中，包埋後上「友瑩勢」。

「皇仁大師」1000轉1400米，很多朋友都會感到奇怪，其實鄭俊偉早有此着，本月6日無用王牌替其報二班同程，想拎保護權意圖甚明顯，如願做後備，隔兩日（本月8日）安排試多課大閘，休戰期內操到行，結合操練、報名意圖，加上潘頓騎番，應唔似想試咁簡單；惟始終是初跑兼負重磅，是否真的能克服難度，存在樂觀靠估成份，只是數匹機會馬之一。

「翔惑」未證明夠贏三班，然而若遇利前置偏差，削弱到對手，也不排除可征服。「勝得威」初出前只操個半月，跑1400米遇偏慢步速，後上爆贏「勇霸神駒」與「翔惑」，絕對值尊重，隔兩周再跑，只比上次多負一磅，跑法可以中置，買Q唔會少咗佢！

「友瑩勢」13檔一定要後追，怕會蝕章，只會作Q腳。尚有兩駒有變數，「綠勇士」兜幾場後，轉1400換布文，抽1檔，不可當佢無到；「幸運興隆」輸兩場快步速1600，縮落1400其實啱數，只覺10檔不理想，才無揀。

第七場國際二級賽1600米：日前提及的「大印銀紙」，無頭罩唔知臨場情緒定或急，博W轉吼越戰越勇的「喜蓮獎星」，純覺得下月國際賽不論跑1600或2000勝望都不大，應無等的理由，比上次孭少十磅，用布文有分頭值博。

「美麗大師」級數夠且準繩，屬正路不能飛的實力馬。「美麗之星」埋門與廐侶拍跳，表現全不落下風，且屬這場唯一前領馬，亦不能過份低估。「首飾太陽」狀態比上次再好些。「壯思飛」埋門晨課表現，引死我們晨操客，狀態好還好，一定要考慮級數。