花旗銀行最近針對香港有成27萬人嘅「年輕高薪族」，做咗個樣本調查，發現呢班月薪超過兩萬五蚊嘅「七、八十後」好有野心，一半人覺得自己可以取代直屬上司，更加認為自己表現仲會更勝一籌。

42%仲愛權位多過錢，當中超過三成人甚至為咗升職一級，願意減薪超過兩成；而且仲係越後生嗰批，就話越唔鍾意同老細同枱食飯！
大家可能都會質疑，佢哋憑乜可以咁自信爆棚？但呢班年輕高薪族確係有呢個本錢，佢哋基本都有高學歷，過半數有車有樓，仲肯持續進修。佢哋唔少通過頻密跳槽實現加薪，其中五年內跳槽兩次以上嘅加幅最高，達到五成，多過中位數一倍㗎。但佢哋又唔算係大花筒，花旗環球個人銀行服務香港區市務總監吳詩雅話，超過九成人都有儲錢，每個月平均有28%作多元化投資，平均每人都有成50萬流動資產，都算慳家㗎喇。